ÌWÀ ÀÌBÍKÍTÀ ÀWỌN AKẸ́KỌ̀Ọ́ SÍ Ẹ̀KỌ́: ÌṢÒRÒ TÍ Ń DÀGBÀ SÍ
Ólùko: Kultum Alade, Samuel Akintola
Aago mẹ́jọ òwúrọ̀ ọjọ́ Ajé ni. Nígbà tí àwọn olùkọ́ ti bẹ̀rẹ̀ ẹ̀kọ́ nínú àwọn yàrá ìkẹ́kọ̀ọ́, àwọn akẹ́kọ̀ọ́ kan ṣì ń wọ ilé-ẹ̀kọ́ lọ́wọ́lọ́wọ́. Àwọn mìíràn sì ń bá ara wọn sọ̀rọ̀, wọ́n ń lo fóònù lórí ayélujára, wọ́n ń ya fọ́tò tàbí fídíò fún ìfihàn lórí àwọn ojú-òpó ayélujára, tàbí wọ́n jókòó ní ibi ìsinmi. Fún ọ̀pọ̀ nínú wọn, wíwá sí kíláàsì kò ṣe pàtàkì mọ́. Ìṣẹ̀lẹ̀ yìí ń fi hàn pé ìṣòro tuntun kan ń gbilẹ̀ ní ọ̀pọ̀ ilé-ẹ̀kọ́ gíga—ìwà àìbíkítà àwọn akẹ́kọ̀ọ́ sí ẹ̀kọ́.
Látìgbà pípẹ́ ni a ti mọ ẹ̀kọ́ gẹ́gẹ́ bí kọ́kọ́rọ́ sí ìdàgbàsókè ènìyàn àti orílẹ̀-èdè. Ẹ̀kọ́ ń fún ènìyàn ní ìmọ̀, ọgbọ́n àti ìwà rere tó ṣe pàtàkì fún àṣeyọrí. Ṣùgbọ́n lónìí, ó dà bí ẹni pé ọ̀pọ̀ akẹ́kọ̀ọ́ kò nífẹ̀ẹ́ sí ẹ̀kọ́ mọ́ bí ti tẹ́lẹ̀. Ìfẹ́ sí kíkẹ́kọ̀ọ́ ti ń rọ̀ lọ́wọ́lọ́wọ́, ó sì ń fi àyè sílẹ̀ fún ìdárayá, ìfọkànsìn sí ohun tí kò ṣe pàtàkì àti àìbíkítà.
Ọ̀kan lára àwọn ohun tó ń fa ìbànújẹ ni pé ọ̀pọ̀ akẹ́kọ̀ọ́ kò ka àìsí wọn ní yara ikęko sí ohun tó burú mọ́. Fún wọn, kò sí ìṣòro tí wọ́n bá pàdánù ẹ̀kọ́, nítorí wọ́n gbà pé wọ́n lè gba àkọsílẹ̀ lọ́wọ́ àwọn ọ̀rẹ́ wọn tàbí kí wọ́n kàwé díẹ̀ kí ìdánwò tó dé. Èrò yìí ti mú kí iye àwọn tó ń lọ sí kíláàsì dín kù gidigidi. Nípa bẹ́ẹ̀, wọ́n ń pàdánù ànfààní láti bá olùkọ́ wọn ṣe àjíròrò, béèrè ìbéèrè àti láti lóye àwọn kókó ẹ̀kọ́ dáadáa.
Pẹ̀lú èyí, ìfẹ́ sí ọrọ̀ ayé àti àwọn ohun ìṣeré ti di ohun tí ọ̀pọ̀ akẹ́kọ̀ọ́ ń fi síwájú ju ẹ̀kọ́ lọ. Ọ̀pọ̀ nínú wọn máa ń ná owó púpọ̀ lórí aṣọ àgbéléwò, bàtà, ẹ̀ṣọ́, àpò àti àwọn ohun ìṣọ́ra mìíràn, ṣùgbọ́n wọ́n á máa ṣàròyé nígbà tí wọ́n bá ní láti san owó fún handout, ohun èlò practical, iṣẹ́ ilé tàbí owó ẹ̀ka. Dípò kí wọ́n fi owó sínú ẹ̀kọ́ wọn, wọ́n ń fi agbára wọn lé bí àwọn ẹlẹgbẹ́ wọn ṣe máa rí wọn lójú. Ìṣàkóso àìtọ́ yìí sì máa ń dá wọn láàmú nípa ìlera ẹ̀kọ́ wọn.
Ọ̀pọ̀ nǹkan ló ń fa ìwà yìí. Ìdàgbàsókè ayélujára ti di ọ̀kan lára àwọn ohun tó ń gba àkókò àwọn akẹ́kọ̀ọ́, tí wọ́n yẹ kí wọ́n fi kàwé. Ìfọwọ́sowọ́pọ̀ pẹ̀lú àwọn ọ̀rẹ́ tó ní ìwà búburú tún ń ní ipa, nítorí ó ń mú kí ọ̀pọ̀ wọn fojú kọ ẹ̀kọ́ kí wọ́n sì máa lépa ìgbádùn àti ohun tó ń lọ lásìkò. Bákan náà, àìsí àbójútó àwọn òbí, àyíká ìkẹ́kọ̀ọ́ tí kò dára àti ìṣòro ọrọ̀ ajé tún ń ṣàkóbá fún ìtara sí ẹ̀kọ́.
Àbájáde ìwà àìbíkítà yìí ti bẹ̀rẹ̀ sí í hàn gbangba. Ìpele ẹ̀kọ́ àwọn akẹ́kọ̀ọ́ ń rẹ̀ sẹ́yìn, ìwà jíjẹ́jẹ nínú ìdánwò ń pọ̀ sí i, ọ̀pọ̀ sì ń parí ilé-ẹ̀kọ́ láìní ìmọ̀ àti ọgbọ́n tó yẹ kí wọ́n ní fún ayé iṣẹ́. Èyí kò ní ipa lórí àwọn akẹ́kọ̀ọ́ nìkan, ó tún jẹ́ ewu fún ìdàgbàsókè gbogbo àwùjọ.
Nítorí náà, ó ṣe pàtàkì kí a máa gba àwọn akẹ́kọ̀ọ́ níyànjú láti máa lọ sí kíláàsì déédéé, kí wọ́n kópa nínú gbogbo iṣẹ́ ẹ̀kọ́, kí wọ́n sì fi ẹ̀kọ́ wọn ṣáájú àwọn ohun ìṣọ́ra tí kò ṣe pàtàkì.
Ní ayé òde òní tí ìdíje ti pọ̀ sí i, ẹ̀kọ́ ṣì jẹ́ ohun ìní tó lágbára jù lọ fún àṣeyọrí. Gbogbo kíláàsì tí akẹ́kọ̀ọ́ bá lọ, gbogbo iwe ikęko tí ó bá rà, àti gbogbo iṣẹ́ ilé tí ó bá ṣe jẹ́ ìdókòwò fún ọjọ́ ọ̀la rẹ̀. Bí àwọn akẹ́kọ̀ọ́ bá yí ìwà wọn padà lónìí, wọ́n yóò fi ìpìlẹ̀ rere lélẹ̀ fún ọjọ́ ọ̀la tó dára jù lọ.
About oluwablesscreative
No comments